थाकुथि पिथना

  सेप्टेम्बर ९, २०१८ गुंला गाः आमै (बौ या ख्वाः स्वयगु दिनसं) नेपाल संवत ११३८

लबः मकाइगु कथं सन् २००७ सालय् निस्वंगु नेवाः गुठी, न्यूयोर्कपाखें अमेरिका दुने व अमेरिकां पिने च्वना च्वंपि नेवाःतयेगु कला, नेपालभाषा, संस्कृति व बहुसांस्कृतिक परम्परा कथं तिब बिया थपु यायेगु ज्याय् पलाः न्ह्याका वया च्वंगु दु। अमेरिकाया थीथी थासय् च्वना वया च्वंपिं नेवाःत सकलयात छथाय् हे मुना छगु हे कुसा क्वये छधी छप्पं याना यंकेगु तातुना थ्व गुठी न्ह्याना च्वंगु दु । अथेहेतुं नेवाः संस्कृति व परम्परायात देशं पिने नं म्वाका तयेगु अले नेवाः सांस्कृतिक सम्पदा व धर्म संरक्षण, व नेवाः समुदायया सास्कृतिक व धार्मिक ज्याझ्वः याना नेवाः समुदायया मनुत दथुइ बांलागु सम्बन्धया न्ह्याका थवंथवय् सद्भाव न्ह्याका वयाच्वंगु दु। अथेहेतुं नेवाःसमुदायया दुजः न्ह्याथाय् च्वना च्वपिं जूसां ग्वाहालि यायेगु याना च्वंगु दु । संस्कृति व परम्परायात ल्यंका तयेगुया नापनापं आर्थिक व सामाजिकस्तर थपु जुइगु ज्याझ्वःत नं नेवाः गुठी न्यूयोर्कपाखें याना वया च्वंगु दु ।
नेवाः गुठी न्यूयोर्कया थ्वहे नेपाल संवत ११३८ गुंला गाः आम्मै सदअनुसार सेप्टेम्बर ९, २०१८ खुन्हु जूगु तःमुञ्ज्यां सन् २०१८–२०२० या लागिं सर्वसम्मत रुपय् न्हूगु ज्यासना पुचः ल्यःगु दुसा थुके निर्वा्चित जुयादीपिं थथे दु ।
नायः      : भाजू निर्मल प्रधान         न्वकु           : भाजू विजयमान सिंह व मयजू शृजना तुलाधर
छ्यान्जे   : भाजू सन्तोष महर्जन       ल्यु छ्यान्जे  : भाजू सूवर्ण शाक्य
दां भरीं   : मयजू सुर्य श्रेष्ठ महर्जन     ल्यु दां भरीं  : भाजू ह्रदय तुलाधर
दुजः      : भाजू विरेन्द्र मानन्धर, मयजू निशा श्रेष्ठ लामा, भाजू सोमेन्द्र रंजित, मयजू कविना महर्जन, भाजू प्रकाश धर तुलाधर, मयजू मोहिनी श्रेष्ठ, मयजू विनिता नकर्मी व मयजू सिर्जना मल्ल ।
थ्व तःमुन्ज्यां विधान नं संशोधन याःगु दु । न्हूगु विधान कथं गुठीया अध्यक्ष जुइत छगु कार्यकाल कार्यसमितिया पदाधिकारी जुया ज्या यायेमाःगु नियम थपे याःगु दु ।
स्वनिगलय् आदिकालनिसें बसोवास याना वयाच्वंपिं आदिवासी वयाच्वंपिं खः नेवाः । नेवाः भाषाय् काठमाडौं उपत्यकायात ’ने’ धाइगु व लिपा वना ’ने’ पाखें हे नेपाल नां च्वंगु खः धका धाई । ऐतिहासिक प्रमाणया आधार अभिलेख येँया चाबहिलय् अशोककालीन ई अर्थात् ईसा स्वोया न्ह्यो स्वंगुगु शताब्दीनिसें हे मानव वस्ती दूगु खँ ब्राह्मी लिपि च्वया तःगु लिं क्यं । ईसा स्वोया न्ह्यो स्वोंगगु शताब्दी निसें हे स्वनिगलय् मानव दुबले निसें हे नेवाः तयेगु बसोबास जुयावया च्वंगु ऐतिहासिक प्रमाण खः । स्वनिगलय् राज्य सञ्चालनया बारे वंशावलीं उल्लेख जुगु कथं दकले न्ह्यो गोपालवंशी अनंलिपा छसीकथं महिसपाल, अभीर, किरात, लिच्छिवि धुंका मल्ल दे सञ्चालन जूगु खः। दे सञ्चालन याःपिं दक्वं नेवाः जूगुलिं गोपलवंशीया राज्य सञ्चालन न्ह्यः हे स्वनिगलय् नेवा त् दुगु अनुमान यानातःगु खः।
नेवाःतयेगु बसोबास नेपालया ७७ जिल्लाय् दुगु खनेदु नेवाःत थीथी कालखण्डय् स्वनिगलं पिहाँ वंपिं खःसा लिपा वना नेवाःत नेपा दे या च्वोना वया च्वंगु दु ।
लिपांगु तथ्यांकअनुसार नेवाःतयेगु जनसंख्या १३ लाखसिबें अप्वः दुगु खनेदु । उकि मध्ये बच्छी जनसंख्या स्वनिगलय् दुने च्वोना च्वंगु दुसा तथ्यांक अनुसार १३ लाख नेवाःतमध्ये ६३ प्रतिशत नेवाःतसें जक नेपाल भाषा न्ववाय् सः । ल्वमंके मज्युगु तथ्य थ्व खः कि “नेपाल भाषायात संयुक्त राष्ट्रसंघपाखें लोप जुइत्यंगु भाषाया रुपय् सूचि सूचीबद्ध याये धुंकूगु दु ।“
                     
                      नेवाः गुथि, न्यूयोर्क